Ana səhifə Toplum |
Ev dustaqlığında olan sabiq vitse-admiralın Krasnodar şəhərində şərab zavodu var.
Axar.az-a verilən xəbərə görə, Müdafiə Nazirliyi Hərbi Dəniz Qüvvələrinin (HDQ) sabiq komandanı, vitse-admiral Şahin Sultanovun Rusiya şəhərində fəaliyyət göstərən şərab zavodu qardaşı tərəfindən idarə olunur. Barəsində seçilmiş həbs-qətimkan tədbirinin ev dustaqlığı ilə əvəz olunmasından sonra Ş.Sultanov Bayıldakı mənzilində yaşayır. Onun ölkədən çıxması qadağan olunduğu üçün biznesi ilə qiyabi maraqlanır.
Vitse-admiralın qardaşı uzun illərdir Krasnodarda yaşayır və birlikdə şərab biznesi qurublar.
Xatırladaq ki, Respublika Hərbi Prokurorluğunun yaydığı məlumata görə, HDQ-də aparılan yoxlamalar zamanı qanun pozuntuları aşkar edilib. Aşkarlanmış qanun pozuntuları ilə bağlı Respublika Hərbi Prokurorluğunda Cinayət Məcəlləsinin müvafiq maddələri ilə cinayət işi başlanıb. Qanunazidd əməlləri törətməkdə təqsirli bilinən bir neçə nəfər, həmçinin HDQ-nin sabiq komandanı, vitse-admiral Şahin Sultanov təqsirləndirilən şəxs qismində cəlb edilməklə, Respublika Hərbi Prokurorluğunun təqdimatı əsasında ötən il aprelin 23-də Bakı Hərbi Məhkəməsinin qərarı ilə barəsində 3 ay müddətinə həbs qətimkan tədbiri seçilib. Ş.Sultanov Cinayət Məcəlləsinin 313-cü (vəzifə saxtakarlığı) və 179.3.2-ci (mənimsəmə - külli miqdarda törədildikdə) maddələri ilə təqsirli bilinir.
Tarix
2015.03.31 / 08:45
|
Müəllif
Emin Aslanlı
|