Ana səhifə İqtisadiyyat |
"Dünya bazarında neftin bahalaşmasının iqtisadi və fundamental əsasları yoxdur".
Axar.az xəbər verir ki, bu haqda iqtisadçı ekspert Natiq Cəfərli açıqlama verib. O, neftin ucuzlaşmasına təsir göstərən faktorlarının yerində qaldığını, bazarda fundamental dəyişikliklərin olmadığını bildirib:
"Mövcud vəziyyət qiymətlərin aşağı çəkilməsinə xidmət etməliydi. Səudiyyə Ərəbistanı, Rusiya və ABŞ slans neftinin hasilatını artırıblar. Son açıqlanan rəqəmlər göstərdi ki, OPEK-ə daxil olan və olmayan ölkələrdə də hasilat kvotaları keçib. İraqda son 1 ilin ən yüksək həddində neft hasil edilib. Dünyada iqtisadi inkişaf tempi xeyli dərəcədə zəifləyib. Dünyanın ikinci neft istehlakçısı olan Çində istehsal indeksi son illərin ən aşağı səviyyəsinə - 50 punktdan da aşağı düşüb. Bütün bunlar neftin qiymətlərini aşağı çəkməliydi. İranın bazara daxil olacağı ehtimalı da yerində qalıb".
Ekspert onu da bildirib ki, bahalaşma Yaxın Şərqdə, xüsusilə
Yəmən ətrafında baş verən gərginliklə bağlıdır:
"Səudiyyə Ərəbistanının başçılığı ilə koalisiya güclərinin Yəmənə
müdaxiləsi neft bazarında ciddi narahatlıq yaratdı. Yəməndə də neft
hasilatı aşağıdır, gündəlik hasilat 100 min bareldən də azdır.
Lakin Yəmən strateji cəhətdən əlverişli mövqedə qərar tutub.
Tankerlər əsasən, Hörmüz boğazı və Süveyş kanalı vasitəsilə Yəmənin
daxili sularından keçməklə dünya bazarına çıxır. Dünyada
tankerlərlə neft daşımalarının təxminən 30%-i məhz bu bölgədən
keçir. Bu da investorlar və neft istehsalı ilə məşğul olan
treyderlərdə ajiotajın yaranmasına səbəb olur. Hamıda belə bir
qorxu yarandı ki, münaqişə böyüyərsə və Yəmənə müdaxilələr
uzunmüddətli olarsa, boğazlardan keçən tankerlərə təhlükə ola
bilər. Bu isə dünya bazarına neftin çıxarılmasını əngəlləyə
bilər".
Ekspertin sözlərinə görə, digər bir təhlükə İran və Səudiyyə Ərəbistanının Yəmən məsələsinə görə, qarşıdurmaya gedəcəkləri ehtimalı ilə bağlı idi: "Təbii ki, iki böyük neft ölkəsinin münaqişəsi qiymətlərə ciddi təsir göstərən amillərdən biri ola bilərdi. Bütün bu spekuliyasiyalar və real vəziyyət neftin qiymətinin son 1 ayda addım-addım artmasına səbəb oldu. Çox güman ki, Yəmən böhranında yumşalma baş verəcəksə, yenidən bazarın öz köhnə vəziyyətinə (50-55 dollar) qayıtma ehtimalı yüksələcək. Çünki qiymətlərin yenidən aşağı düşməsi üçün fundamental səbəblər yerində qalır. Ona görə də əsas diqqət Yəmən məsələsinin tezliklə həll olunmasına yönəlib".
Tarix
2015.05.06 / 00:07
|
Müəllif
Aygün Yusibova
|