Ana səhifə Gündəm |
Ötən gün ATV-nin "Gündəlik" verilişinin aparıcısı Mətanət Əliverdiyevanın Binəqədi rayonundakı yaşayış binasında baş verən yanğın faciəsi barədə dediyi sözlərə görə üzr istəməsi ona qarşı olan ittihamları sakitləşdirmək əvəzinə daha da artırıb.
Axar.az xəbər verir ki, Mətanət Əliverdiyeva fikrini düzgün ifadə etmədiyini deyib üzr istəyərkən, bu sözlərdən istifadə edib:
"Bu faciəni yaşayan insanların hissiyatına toxunmuşamsa, onlarda
doğurdan da qıcıq yaratmışamsa, elə sözümü yozan insanların adından
hamıdan üzr istəyirəm".
Əvvəlcə üzr istəməkdə bir qəbahət olmağını deyən Mətanət
Əliverdiyeva sonra öz adından deyil, onun sözünü yozanların adından
üzr istəməklə məsələni yenə boynundan atıb. Üstəlik, veriliş davam
edərkən ümumiyyətlə, üzr istəmək məsələsi təkzib olunub. Belə ki,
tanınmış jurnalist Orxan Fikrətoğlu onun üzr istədiyini nəzərə
çatdırarkən, müğənni Könül Xasıyeva üzr istəmədiyini, yalnız suçlu
olanların üzr istəyə biləcəyini, Mətanətin isə suçu olmadığını
deməsi və aparıcının da onun mövqeyini dəstəkləməsi "üzrxahlıq
şousunun" mahiyyətini ortaya qoymuş olub.
Əgər "Gündəlik" verilişinin 20 may tarixli buraxılışında 15 nəfərin ölümünə səbəb olan faciə barədə "Biz o faciəni lap belə, faciə etməməliyik. Oldu, elə bil bir külək idi, bir şey idi, bir film idi baxdıq, getdi" sözlərini işlətməklə Mətanət Əliverdiyeva fikrini doğru-düzgün ifadə etməkdə çətinlik çəkmişdisə, başqa sözlə, qeyri-peşəkarlıq nümayiş etdirmişdisə, ötən gün işlədilən "sözümü yozanlar adından üzr istəyirəm" sözü artıq qeyri-peşəkarlıq yox, həm də qeyri-etikdir.
Təsadüfü deyil ki, ötən gündən Mətanət Əliverdiyevanın sosial şəbəkələrdə kəskin şəkildə tənqid olunması bu "üzrxahlıqdan" sonra daha da şiddətlənib.
Tarix
2015.05.22 / 11:07
|
Müəllif
Aqşin Evrən
|