Bakıda 15 nəfərin öldüyü yanğınla bağlı tutulanların ittiham olunduğu maddələrə görə gözlənilən cəzaları açıqlanıb.

Axar.az-ın xəbərinə görə, həbs edilən 5 nəfər Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham edilirlər.

Cinayət Məcəlləsinin 225.2-ci - ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma maddəsinə görə təqsirləndirilən şəxslər 3 ilədək, müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 3 ildən 7 ilədək azadlıqdan məhrum edilə bilər.

Cinayət Məcəlləsinin 308.2-ci - vəzifə səlahiyyətlərindən sui-istifadə maddəsinə görə isə 3 ilədək müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla, 3 ildən 8 ilədək azadlıqdan məhrumetmə cəzası nəzərdə tutulub.

Cinayət Məcəlləsinin 314.2-ci - ağır nəticələrə səbəb olan səhlənkarlıq maddələri ilə açılan cinayət işinə görə isə 5 ilədək müddətdə azadlıqdan məhrumetmə ilə cəzalandırılır.

Qeyd edək ki, binaların üzlənməsində istifadə olunan "poliuretan" məmulatını istehsal edən "Qlobal Stone" MMC-nin baş direktoru Uğur Bəşirov, "Global Construction" MMC-nin sədr müavini Ələkbər Əsgərov, Binəqədi rayon İcra Hakimiyyətinin təsərrüfat şöbəsinin müdiri Ədalət Rəcəbov və Binəqədi rayonu, 72 saylı mənzil-kommunal istismar sahəsinin rəisi Nizami Orucov barəsində 4 ay müddətinə həbs qətimkan tədbiri seçilib. "Global Construction" şirkətinin rəhbəri Miryusif Mahmudov da məlum hadisəyə görə saxlanılıb.