İspaniyada təxminən 35 milyon seçicinin qatıldığı bələdiyyə seçkisi ölkənin demokratiya tarixində yeni siyasi dövrün başlanğıcı sayılacaq nəticələrlə yadda qalıb.

Axar.az xəbər verir ki, ölkədə qəbul olunan iki partiyalı (Xalq Partiyası (PP) və Sosialist Fəhlə Partiyası (PSOE) siyasi quruluş dünən keçirilən seçkilərdən sonra yenə də qalib gəlib.

Lakin iqtisadi böhran zamanı yaranan Podemos Partiyası və ilk dəfə seçkilərə qatılan Ciudadanos (Vətəndaşlar) Partiyası heç bir böyük şəhərdə qalib gələ bilməsə də, yerli məclislərdə təmsilçilik hüququ qazana biliblər.

İspaniya baş nazirinin müavini və hökumət sözçüsü Soraya Saenz de Santamaria seçkilərdə fəallığın 2011-ci illə müqayisədə 2 faiz aşağı endiyini (64,77 faiz) açıqlayıb.

İlkin nəticələrə görə, hazırkı iqtidar Xalq Partiyası ümumi səslərin 26 faizini qazanaraq qalib elan olunub. Partiya 13 muxtar rəhbərliyin 9-da və ölkə daxilində 31 böyük bələdiyyə seçkilərində qalib gəlsə də, bu nəticə ötən seçkilərlə müqayisədə ciddi itki hesab olunur.

Ana müxalifətdə yer alan PSOE səs itkisinə məruz qalmasına baxmayaraq, 25 faiz səslə 13 böyük şəhərdə lider olub.

İspaniyanın ən mühüm şəhərlərindən olan Barselonada isə tarixi nəticə əldə olunub. Podemos Partiyasının dəstəklədiyi Ada Kolau 1 yer fərqlə Barselonada ən çox səs qazanıb. Kolau Barselona şəhərinin ilk qadın bələdiyyə başçısı olacaq.