"SSRİ-nin dağılması ərəfəsində gələcək Rusiya maraqlarının təminatı olan etnik-ərazi münaqişələrinin bir çoxu məhz Primakovun rəhbərliyi altında təşkil olunmuşdu".

Axar.az xəbər verir ki, bu barədə politoloq Ərəstun Oruclu öz Feysbuk hesabında yazıb. O, Rusiyanın keçmiş Baş naziri Yevgeni Primakovla bağlı fikirlərini bölüşüb:

"Bu insanın bütün həyatı təxribatçılıq və dağıdıcılıq içində keçdi. Primakov sovet partiya və KQB sistemlərinin yetişdirmiş olduğu ən nadir nüsxələrdən biri idi. Bu adamın gah iqtisadçı, gah şərqşünas, gah jurnalist, gah da diplomat olması göstərirdi ki, Yevgeni Maksimoviç bütün bu "peşələrinin" arxasında daim öz əsas mahiyyətini - casusluğunu gizlədirdi və həmin casus fəaliyyəti sayəsində (özü də söhbət kifayət qədər iri çaplı casusdan gedir) əvvəllər Yaxın Şərqdə, SSRİ-nin dağılması ərəfəsində sovet respublikalarında, imperiya dağıldıqdan sonra isə dünya miqyasında ən çirkin əməllərdə fəal iştirakçı oldu. Belə ki, Misirdə və İraqda jurnalist qismində çalışan Primakov bu ölkələrdəki rejimlərlə yanaşı, həm də onlara qarşı silahlı mübarizə aparanlarla "ünsiyyət" qurmağa müvəffəq oldu. Məsələn, İraq diktatoru Səddam Hüseynlə və bu ölkənin vitse-prezidenti olmuş Tariq Əzizlə yaxın münasibətlər qurmuş sovet casusu, eyni zamanda, çox rahat şəkildə ölkənin şimalına səfərlər edərək kürd lideri Məsud Bərzani ilə də görüşə bilirdi".

Ə.Oruclu keçmiş baş nazirin Azərbaycanın yaddaşında iki əsas hadisə - Qarabağ və 20 Yanvar faciəsi ilə qalacağını deyib:

"SSRİ-nin dağılması ərəfəsində gələcək Rusiya maraqlarının təminatı olan etnik-ərazi münaqişələrinin bir çoxu məhz onun rəhbərliyi altında təşkil olunmuşdu:

Postsovet ölkələrdəki milli hakimiyyətlərin devrilməsi zamanı isə Primakov artıq xeyli böyümüşdü və bir zamanlar casusu olduğu Rusiya Xarici Kəşfiyyat Xidmətinin direktoru idi və öz çirkin əməllərini artıq qlobal miqyasda həyata keçirirdi. Bu insan bizim yaddaşımızda və tariximizdə iki əsas hadisə ilə qalacaq. Qarabağ faciəsi və qanlı 20 Yanvar təcavüzünün əsas təşkilatçısı kimi. Deyirlər, yaxşıya da rəhmət düşür, pisə də, ancaq məncə Primakov kimisinə ancaq lənət düşür".