Azərbaycan Dövlət Musiqili Teatrı 105-ci mövsümünə gələn ay yekun vuracaq. Sona çatmaqda olan mövsüm uğurlu və əlamətdar hadisələrlə zəngin olub, bir sıra tamaşaların premyerası keçirilib, teatrın aktyorları səmərəli fəaliyyətlərinə görə müxtəlif rəsmi və yaradıcı təşkilatların mükafatlarını qazanıblar.

Axar.az xəbər verir ki, teatrın bağlanışı iyulun 12-də saat 19:00-da Üzeyir Hacıbəylinin "O olmasın, bu olsun" tamaşası ilə olacaq.

Xatırladaq ki, "O olmasın, bu olsun" tamaşası Musiqili Teatrın 105-ci mövsümdəki ən uğurlu tamaşalarından biri olub. Tamaşada Məşədi İbad obrazını canlandıran əməkdar artist Şövqi Hüseynov bu rolun ifasına görə Mədəniyyət və Turizm Nazirliyinin "Zirvə" Milli Mükafatına layiq görülüb.

Tamaşanın quruluşçu-rejissoru Azərbaycan Respublikasının xalq artisti, "Şöhrət" ordenli, Cənnət Səlimovadır. Tamaşada rolları milyonların sevimli gülüş ustası, xalq artisti, "Şöhrət" ordenli Afaq Bəşirqızı, əməkdar artistlər Şövqi Hüseynov, Əkbər Əlizadə, Ələkbər Əliyev, Səidə Şərifəliyeva, Novruz Əliyev, aktyorlar Amil Məmmədov, Əzizağa Əzizov, Nadir Xasıyev, Hüseyn Əlili və başqaları ifa edirlər.