Ölkə və millət kimi sağ qalmaq istəyiriksə, Azərbaycanın yaxın gələcəyi üçün vətəndaş millətçiliyindən başqa yolu yoxdur.

Axar.az xəbər verir ki, bu açıqlama ilə siyasətçi Erkin Qədirli çıxış edib.

Onun sözlərinə görə, coğrafi mövqe məsələsi dövlətlərin taleyi üçün mühüm əhəmiyyət kəsb edir:

"Qonşuluğumuzda bir dənə də dinc ölkə yoxdur. Hamısı da bizə ya açıq, ya da gizli şəkildə qarşıdır. Bölgəmizdə heç bir ölkənin sərhədləri sabit deyil, hər an dağıla bilər - Rusiyası da dağıla bilər, İranı da, Türkiyəsi də. Hər yerdə şovinizm, dini radikalizm, terrorizm baş qaldırır. Hava yoluyla təxminən 1500 km (Naxçıvandan lap az, təxminən 500 km) bizdən aralı camaatın kütləvi şəkildə başını kəsirlər (sözün hərfi mənasında), bizdən isə humanist, tolerant, multikultural, homofil, daha nə bilim, nə olmağımızı gözləyirlər. Öz aramızda başqa millətlərin dilində danışmağımızı təqdir edir, həvəsləndirirlər. Bir qonşumuz Fransa, başqa bir qonşumuz Almaniya, bir başqası da Avstriya kimi ölkələr olsaydı, biz heç ordu saxlamazdıq, 3-4 dili ölkəmizdə rəsmi dil elan edərdik, sərhədləri açardıq və s. Coğrafiyanın təsiri böyükdür. Ölkə və millət kimi sağ qalmaq istəyiriksə, Azərbaycanın yaxın gələcəyi üçün vətəndaş millətçiliyindən başqa yolu yoxdur. Vətəndaş millətçiliyi, başqa nəsnələrlə yanaşı, həm də dünyəvi dövlət qavramını içinə alır. Bu coğrafiyada dünyəvilik bizim üçün bir tək daxili ictimai quruluş məsələsi deyil. Bizim üçün (bu coğrafiyada) dünyəvilik - müstəqillik məsələsidir".