"Elektron hökumət" portalının operatoru – Rabitə və Yüksək Texnologiyalar Nazirliyinin Məlumat Hesablama Mərkəzinin (MHM) Zəng (Çağrı) Mərkəzi bu yaxınlarda daha bir innovativ xidmətin təqdimatına hazırlaşır.

Axar.az xəbər verir ki, mərkəzdən Azərtac-a bildirilib ki, tezliklə, Zəng Mərkəzinə qurumlarla bağlı daxil olunan müraciətlərin dərhal aidiyyəti qurumun zəng mərkəzinə yönləndirilməsi üçün sistem yaradılacaq. Bununla da, vətəndaşların digər qurumlarla bağlı müraciətləri vaxt itirilmədən yönləndiriləcək və cavablandırılacaq.

Qeyd edək ki, MHM təqdim olunan xidmətlərin keyfiyyətinin artırılması üçün ötən il 157 Zəng (Çağrı) Mərkəzi yenilənib. Mərkəz istər texniki avadanlıq baxımından, istərsə də ixtisaslı kadr baxımından tam şəkildə təchiz edilib. Nəticədə Zəng (Çağrı) Mərkəzinə olunan müraciətlərin sayı xeyli artıb. Ötən ilin sentyabr ayından bu günədək mərkəzə 61071 zəng daxil olub və bütün zənglər operativ şəkildə cavablandırılıb. Bundan əlavə, 157 Zəng (Çağrı) Mərkəzi "Elektron hökumət" portalı üzərindən vətəndaşlara təqdim olunan "Onlayn konsultasiya" xidməti vasitəsilə daxil olan müraciətləri də cavablandırır. Bu xidmət üzrə ötən bir ayda mərkəzə 3964 müraciət daxil olub. Həmçinin, MHM-in elektron poçt ünvanı üzrə mərkəzə təxminən 30000 müraciət daxil olub və hər bir müraciətə eyni diqqətlə baxılıb. Bundan başqa gün ərzində MHM-in "Skype" və "Facebook" ünvanına 20-dən artıq müraciət daxil olur və dərhal həll edilır.