Çin iqtisadiyyatında son günlər baş verən tənəzzül bu valyutanı ucuzlaşdıra bilər.

Bu sözləri Axar.az-a açıqlamasında iqtisadçı-ekspert Samir Əliyev Çin birjasında baş verən hadisələri şərh edərkən deyib. Mütəxəssisin sözlərinə görə, belə bir vəziyyətdə Çinə yatırılan investisiyalar səmərəliliyini itirir:

"Çin iqtisadiyyatında müşahidə edilən tənəzzül elementləri, fond birjasının çökməsi, yuanın və Çin aktivlərinin cəlbediciliyini azaldır. Hazırda Azərbaycan Neft Fondunun aktivlərinin 1,4%-i yuanda saxlanılır. Söhbət 3 milyard yuandan gedir. Fond 2-ci rübdə Çün valyutasını ehtiyatlarına daxil edib. İndi isə yuan təhlükə qarşısındadır və hesab edirəm ki, NF təcili tədbirlər görməlidir. Çünki Çin iqtisadiyyatının əvvəlki imkanlarını bərpa ehtimalı barədə danışmaq olduqca tezdir".

Xatırladaq ki, Dövlət Neft Fondu (ARDNF) investisiya portfelinin valyuta səbətinin yüksək diversifikasiyanın təmin edilməsi istiqamətində Çin yuanında investisiyalara başlamışdı.

Bu məqsədlə 2014-cü ildə Çinin Mərkəzi Bankından (PBOC) alınmış lizensiya çərçivəsində 3 milyard yuan məbləğində vəsait Çinin dövlət və agentliklərinin istiqrazlarına yerləşdirilmişdi.