İsrail Knessetindəki ərəb millət vəkilləri Baş nazir Binyamin Netanyahu hökumətinə xəbərdarlıq ediblər.

Axar.az xəbər verir ki, Məscidi-Əqsanı bölmə cəhdinə qarşı çıxan ərəb deputatlar məsələ ilə bağlı bəyanatla çıxış ediblər:

"Məscid-i Əqsa bütün bölümləri ilə müsəlmanlara aiddir. Bura Fələstin və ərəb xalqına aid müqəddəs və dəyəri yüksək bir məkandır. Qorunması və içində ibadət azadlığının zəmanət altına alınması lazımdır. Bu vəziyyəti dəyişdirməyə qarşı atılan hər cür addım isə şiddət və qanlı döyüşlərə səbəb olacaq. Netanyahunun mühafizəkar hökuməti müsəlmanların müqəddəs məkanlarına əl uzadaraq yeni bir vəziyyət dəyişikliyi etməyə çalışır".

Xatırladaq ki, iyulun 26-da yəhudi mühacirlər Süleyman məbədinin dağılmasının anıldığı "TİSA BeAv" adı verilən matəm günü münasibətilə səhər saatlarında İsrail polisinin nəzarəti altında Əqsaya daxil olmuşdu.

Yaranan qarşıdurma nəticəsində 17 fələstinli, 4 polis yaralanmış, onlarla insan həbs olunmuşdu.