Ana səhifə İqtisadiyyat |
Azərbaycanda hər min nəfərin 1273 ədəd kredit və əmanət hesabı var.
Axar.az xəbər verir ki, bu sözləri iqtisadçı ekspert Qubad İbadoğlu deyib. Ekspert bildirib ki, bank sektorunun xarici borcunun qalıq məbləği 6.4 mlrd. manat təşkil edir:
"Əgər Mərkəzi Bank qısa müddətli dövrdə pul-kredit siyasətini tənzimləməsə, bankların mövcud problemləri ciddi sosial fəsadlar və iqtisadi çətinliklər yarada bilər. Bank-müştəri münasibətlərində gərginliyin getdikcə artması, qeyri-qənaətbəxş və təhlükəli kreditlərin həcminin çoxalması, əmanətlərin azalması və sürətlə dollarlaşması, bank sektorunun aktivlərinin azalması və xarici borcunun qalıq məbləğinin cəmi öhdəliklərdə payının yüksəlməsi və digər neqativ tendensiyalar Mərkəzi Bankdan ciddi və təxirəsalınmaz qərarların qəbulunu tələb edir".
Statistika haqqında məlumat verən ekspert qeyd edib ki, bankların bağlanması və ya muflis olması ciddi sosial katalikizmlərə gətirib çıxara bilər:
"Statistik məlumatlara görə, 2013-cü ildə əhalinin yetkinlik yaşına çatmış hər 1000 nəfərinin 1,244 ədəd, 2014-cü ildə 1259, 2015-ci ilin I-ci rübün sonuna 1273 ədəd kredit və əmanət hesabı olub. Bu o deməkdir ki, hər bir Azərbaycan əhalisi bu və digər formada banklarla təmasdadır. Odur ki, bankların bağlanması və ya muflis olması ciddi sosial katalikizmlərə gətirib çıxara bilər. Bəzi bankların problemi yalnız daxildə müştərilərlə deyil, həm də xaricdəki maliyyə institutları arasında da müşahidə olunur. Belə ki, 31 mart 2015-ci il tarixinə Azərbaycan bank sektorunun xarici borcunun qalıq məbləği 6.4 mlrd. manat və ya cəmi öhdəliklərin 22%-ni təşkil edib. Manatın devalvasiyasından sonra bankların xarici valyutalarla götürülən öhdəliklərini yerinə yetirməsində qarşılaşdığı çətinliklər onların maliyyə durumunu getdikcə pisləşdirməkdədir".
Tarix
2015.07.29 / 10:36
|
Müəllif
Nigar İxtiyarqızı
|