Fransız deputatlardan "nümunə" götürən italyan millət vəkilləri Krıma səfər edəcək.

Axar.az xəbər verir ki, bu barədə məlumatı "Kommersant" qəzeti yayıb. Nəşrin məlumatına görə, Roma rəsmiləri insanların necə yaşadığını öz gözləri ilə görmək üçün səfəri reallaşdıracaqlar.

İtaliyanın Beş Ulduz Partiyasının millət vəkili Manlio Di Stefano qəzetə verdiyi açıqlamasında səfərin detallarının müəyyənləşdirilməsi üçün Romadakı Rusiya səfirliyi ilə əlaqə yaratdıqlarını deyib. Onun sözlərinə görə, Krıma parlamentin Xarici əlaqələr komitəsinin üzvü Alessandro Di Battistanın rəhbərliyi ilə 10 nəfərdən ibarət heyət səfər edəcək.

Oktyabr ayında baş tutacaq səfərə radikal sağçı deputat Sergio Divina da qatılacaq.

Səfər Federasiya Şurasının üzvü Andrey Klimovun dəvəti ilə reallaşır.

Bu arada fransız və italyan parlamentarilərdən sonra Macarıstan millət vəkillərinin də Krıma səfəri gözlənilir. Parlamentin Xarici əlaqələr komitəsinin sədr müavini Marton Gyöngyösi bildirib ki, səfər yaxın həftələrdə baş tutacaq.