Rusiya Prezidenti Vladimir Putin radikal terror təşkilatlarının beynəlxalq cinayət təşkilatları ilə birləşməsinin dünya üçün ən böyük təhlükə olduğunu deyib.

Axar.az məlumat verir ki, Yaroslavl şəhərində təşkil edilən beynəlxalq kəşfiyyat təşkilatları və hüquq-mühafizə qüvvələrinin 14-cü toplantısına məktub ünvanlayan Kreml rəhbəri terrorçuluğun inkişafından böyük narahatlıq duyduğunu bildirib.

Putinin sözlərinə görə, bu gün dünyanın ən pis vəziyyətdə olan regionları Yaxın Şərq və Şimali Afrikadır:

"Terrorçular bu iki bölgəni mərkəz kimi istifadə edir. Onlar bu bölgələrdə yerli dəstəkçilər taparaq onlara təlim keçir. Öyrətdikləri insanlar digər dövlətlərin qeyri-sabit hala gətirilməsi üçün istifadə edilir".

Putin mövcud təhdidlərə qarşı dünya dövlətlərinin sistemli iş və əməkdaşlıq çərçivəsində mübarizə aparmalı olduğunu qeyd edib. O, toplantının fərqli ölkələrdəki kəşfiyyat təşkilatları, təhlükəsizlik vahidləri və hüquq-mühafizə qüvvələri arasındakı ünsiyyəti artırması baxımından əhəmiyyətli olduğunu deyib.

Bu arada Rusiya Federal Təhlükəsizlik Xidmətinin sədri Aleksandr Bortnikov İŞİD daxilində 100-dən çox ölkə vətəndaşının olduğunu açıqlayıb. Yığıncaqda danışan Bortnikov hazırda İŞİD-in təbliğat sahəsində təşəbbüsü ələ keçirdiyini, beynəlxalq cəmiyyətin isə lazımi tədbirlər görmədiyini bildirib.