"Qardaşım Mahirlə bir yerdə gedən dostları Elsevərlə Turaldır. Təxminən, eyni yaşdadırlar. Elsevər xilasedici jilet geydiyi üçün sağ qalıb, Tural isə ümumiyyətlə dənizə girməyib".

Bu sözləri Axar.az-a ötən gecə dənizdə qardaşı batan tanınmış müğənni Tacir Şahmalıoğlu deyib.

Onun sözlərinə görə, qardaşı Mahir Allahverdiyevlə dostları bir yerdə dəniz kənarında yeyib-içib, sonra skuter sürmək istəyiblər. Tural dənizə girməyib, Elsevər isə Mahirdən fərqli olaraq, xilasedici jilet geyinib. Sənətçi qeyd edib ki, qardaşının batdığı yer sahildən 1 kilometr uzaq olduğu üçün tapılması hələ də mümkün olmayıb:

"Mahir normal üzə bilirdi. Peşəkar üzgüçü deyildi, amma üzməyi yaxşı bacarırdı. Skuterlə dənizə açılıblar. Nə olubsa, orada olub".

T.Şahmalıoğlu bildirib ki, qardaşının iki azyaşlı övladı var.

Qeyd edək ki, hadisə Novxanı çimərliyində baş verib. Müğənni özü və qohumları hazırda hadisə baş verən ərazidədirlər. Xilasedicilərin axtarışları davam edir.

FHN-ə isə ötən gecə Novxanıda 2 nəfərin batdığı barədə məlumat daxil olub. Digər şəxsin kimliyi hələlik açıqlanmayıb.