İraqın paytaxtı Bağdadın Əbu Qureyb və Yusufiyə bölgələrində yol kənarında quraşdırılan partlayıcının işə düşməsi nəticəsində böyük partlayışlar baş verib.

Axar.az xəbər verir ki, partlayışlarda 8 nəfər həlak olub, 17 nəfər isə yaralanıb.

Hücumların məsuliyyətini heç bir terror təşkilatı üzərinə götürməyib, eyni zamanda, partlayış haqqında heç bir rəsmi açıqlama verilməyib.

Xatırladaq ki, İraqda İŞİD terror təşkilatının bəzi bölgələrdə nəzarəti ələ keçirməsindən sonra Bağdad başda olmaqla müxtəlif şəhərlərdə baş verən qarşıdurmaların və terror hadisələrinin artması görünür. İraq təhlükəsizlik işçiləri hücumların İŞİD-la əlaqəli qruplar tərəfindən təşkil edildiyini bildirirlər.