Ana səhifə Yazarlar |
Bu gün Azərbaycanın mərhum yazıçısı Rafiq Tağının doğum günüdür. O, 1950-ci ilin bu günü Masallı rayonunda anadan olub.
Yaşasaydı, bu gün 65 yaşını qeyd
edəcəkdi...
Rafiq Tağı gözəl yazıçı olmaqla bərabər, həm də həkim idi. O, təkcə xəstəxanalarda deyil, kitab təqdimatlarında, ədəbi tədbirlərdə də həkim olurdu. Rafiq Tağı ürəyi dərmanla, beyini sözlə müalicə edəcək qədər peşəkar və... zarafatcıl insan idi. Bir anda əlində Əlifba kitabı vərəqləyən 1-ci sinif şagirdinə çevrilə bilirdi.
Qalın eynəyi arxasında bozaran gözləri nə qədər uzaq görünsə də, əslində, çox yaxın idi. O, eynək arxasından insanların ürəyini mikroskopla izləyirmiş kimi baxırdı. Rafiq Tağı insanları gözləri ilə görmürdü, onları gözləri ilə duyurdu.
Bəzi qələm yoldaşları onu "Azərbaycanın Çexovu" adlandırırlar.
Rafiq Tağı bir çox palatalardan alnıaçıq, üzüağ çıxmışdı. Bəlkə də
elə buna görə siması eynəyindən daha çox parlayırdı – üzündə qəribə
nur var idi.
Onun yaradıcılığı haqda çox danışmaq olar... ancaq məncə, onun
əsərləri haqda çoxlu-çoxlu susmaq lazımdır.
Rafiq Tağı ömrünün 65-ci sükutundadır.
Təəssüf ki, "altı nömrəli palata"dan çıxmaq Azərbaycanın Çexovuna qismət olmadı... və o, 2011-ci ilin 23 noyabrında vəhşicəsinə qətlə yetirildi.
Tarix
2015.08.05 / 13:27
|
Müəllif
Aqşin Evrən
|