Kinoda bəzi texnologiyalardan istifadə olunur ki, kino çəkmək istəyən rejissorun onlardan başı çıxmalıdır.

Bu sözləri rejissor Bəhram Osmanov teatr rejissoru ilə kino rejissorunun fərqli və oxşar cəhətləri haqda Axar.az-a danışarkən deyib. O bildirib ki, hər iki sənət ortaq nöqtədə birləşir:

"Teatr rejissoru ilə kino rejissoru eyni sənətdir. Hər ikisi eyni nəzəriyyəni keçir. Bəzi xırda fərqlər var. Kinorejissor öz işini kamera arxasından, kamera prizmasından, obyektivindən görməyi bacarmalıdır. Səhnənin isə öz yazılan və yazılmayan qanunları, perspektivi var. Teatr rejissoru bunu bilməli, duymağı bacarmalıdır.

Əslində, mən teatr rejissoru ilə kino rejissoru arasında böyük bir fərq görmürəm. Dünyanın bir çox rejissorları həm tamaşalar hazırlayır, həm filmlər çəkir – hər ikisi də uğurlu alınır.

İstər teatrda, istərsə də kinoda aktyorun rola uyğun gəlib-gəlməməsi məsələsinə fikir vermək lazımdır. Rejissor aktrisadan tələb etməlidir ki, filan rola görə bu formaya düşsün. Kinoda daha çox tipaj axtarırlar, görünüş çox lazımdır onlara, ona görə bu tələb onlarda daha çox olur. Amma hər halda bütün bunlar şərtidir".