20 gündür yazıçı-rəssam Fərhad Yalquzaqdan xəbər yoxdur. Bir neçə ay əvvəl ucqar dağ kəndlərindən birində, sivilizasiyadan uzaqda həyat sürməyə qərar verdi və əşyalarını, əmlakını – hər şeyini sataraq bilinməzlərə qarışdı.

Axar.az xəbər verir ki, Fərhad Yalquzaq haqqında bu məlumatı yazar-şair Rasim Qaraca Feysbuk sosial şəbəkəsindəki hesabında paylaşıb.

"AYO üzvü qeybə çəkilib. 20 gündür yazıçı-rəssam Fərhad Yalquzaqdan xəbər yoxdur. Bir neçə ay əvvəl ucqar dağ kəndlərindən birində, insanlardan, sivilizasiyadan uzaqda həyat sürməyə qərar verərək, əşyalarını, əmlakını – hər şeyini sataraq bilinməzlərə qarışdı. Yanına telefon, radio belə almadan yoluna davam etdi. İlk hədəfi ağaclardan özünə bir sığınacaq düzəltmək və azuqə (qaxac ət) toplamaq idi. Fərhaddan çox narahatam. Artıq soyuq düşməyə başlayıb. Azərbaycan tarixində ilk dəfə belə bir riskli həyatı öz üzərinə götürmək nümunəsi gerçəkləşəcəkmi? Fərhadın qeyri-adi iradə sahibi olduğunu bilirəm. Amma düşüncələrimin bir bölgəsi daim onunla məşğuldur..."

Xatırladaq ki, F.Yalquzaq özü də avqustun 7-də status yazaraq bu haqda məlumat vermişdi:

"Dostlar, sabah Bakıdan çıxıram, həyatımı daha rəngarəng etmək üçün dağ rayonlarından birinə çəkilirəm. Buraya bir də gələn ilin mart-aprel aylarında, bir həftəlik gələcəyəm. Yaşım 42, bundan sonra adamlar arasında deyil, təbiətdə yaşamağı üstün tuturam. Sivil həyatdan qıraqdakı yaşantımı ədəbiyyata çevirəcəyəm. Kimin nə sözü varsa, indidən söyləsin, sabahdan Feysbukda görünməyəcəyəm, telefon əlaqəmi isə 3-4 gündən sonra kəsəcəyəm. Sizə istədiyiniz həyatı, özümə isə arzularımın arxasınca sona qədər getməyi arzulayıram!"