Sağlamlıqla bağlı saytlarda məktəbli çantaları ilə bağlı mühüm məsləhətlər verilib.

Axar.az xəbər verir ki, istənilən yaşda olan məktəblilər bir çiyinə taxılan çantalardan istifadə etməməlidir.

Bu, uşaqlarda skoliozun inkişafına səbəb olacaq. Ən uyğun variant - iki çiyinə taxılan çanta sayılır.

Boş çantanın çəkisi 1 kilodan artıq olmamalıdır.

Kiçik yaşlı məktəblilərin çantaları sərt olmalıdır. Bu, xüsusilə uşağın belinə söykənən hissəyə aiddir. Çünki çantanın içində olan kitablar uşağın belinə təzyiq edə bilər.

İbtidai siniflərdə oxuyan uşaqların çantasının arxası ortopedik olmalıdır - onurğanın formasını təkrarlamalıdır. Bu, uşağın qamətini pozmur, əksinə, qamətin normal formalaşmasına kömək edir.

Təbii ki, çantanın malı yüngül, keyfiyyətli, davamlı və su keçirməyən (neylon və ya poliester) olmalıdır. Çanta çox böyük, enli olmamalıdır.

Kiçik yaşlı uşaq üçün çanta seçdikdə daha parlaq rənglərdə olan çantalara üstünlük verməlidir.

Bu uşağın təhlükəsizliyi üçün vacibdir - belə çanta uzaqdan görünür və avtomobil sürücüləri bunu uzaqdan görüb daha diqqətli olacaqlar. Sürücülər üçün ən gözə çarpan rənglər sarı və narıncı sayılır. Uşağa çox böyük, enli çanta almayın - bu onun qamətinə mənfi təsir edəcək.