Sulutəpə dairəsində tıxacların aradan qaldırılması üçün Nəqliyyat Nazirliyi həmin yolda müəyyən işlər aparır.

Azəryolservis ASC-dən Axar.az-a verilən məlumata görə, işlər Bakı-Şamaxı-Yevlax avtomobil yolunun 11-ci km-də davam etdirilir.

Bundan öncə dairəyə Şamaxı istiqamətindən daxil olan nəqliyyat vasitələri dairədə hərəkətdə olan digər nəqliyyat vasitələrinə yol verdikdən sonra hərəkətlərinə davam edə bilirdilər. Bu isə həmin istiqamətdə tıxacın yaranmasına səbəb olurdu. Artıq həmin istiqamətdən gələn nəqliyyat vasitələri dairədə gözləmədən hərəkətlərinə davam edə bilərlər. Digər istiqamətdən daxil olan nəqliyyat vasitələri isə gözlədikdən sonra yollarına davam edirlər. Bunun üçün dairədə artıq müvafiq yol nişanları da quraşdırılıb.

Deformasiyaya uğramış yolun hərəkət hissəsinin bərpa edilməsi işləri də aparılıb. Azəryolservis tərəfindən Bakı-Şamaxı-Yevlax avtomobil yolunun 11-ci km-də nəqliyyat vasitələrinin hərəkətində edilmiş müəyyən dəyişikliklər bu ərazidə nəqliyyat axınına müsbət təsir edərək, nəqliyyat sıxlığının azalmasına səbəb olub.