Komanda sayının çox olmasının tərəfdarıyam. Nə qədər çox olsa, iş yerlərinin sayı da bir o qədər çox olar, çox sayda oyunçu çıxış edər. Amma bizim o qədər büdcəmiz yoxdur ki, komandalara kömək edək.

Axar.az-ın məlumatına görə, bu sözləri Peşəkar Futbol Liqasının prezidenti Ramin Musayev birinci divizionun püşkatma mərasimində deyib. R.Musayev PFL-in rəsmi saytına açıqlamasında bildirib ki, ötən il birinci divizionda oyun alğı-satqısı ilə bağlı müəyyən söz-söhbətlər vardı:

"Mənim həyatım boyu bir əqidəm olub. Güclünün qalib gəldiyini istəmişəm, ədalət tərəfdarı olmuşam. Əgər bu il də belə bir şey olacaqsa, sizdən dəstək gözləyəcəyəm. Başa düşə bilmirəm ki, kişi kişiyə necə deyə bilər ki, çıxın, uduzun? Çempionatda iştirak edən komanda təkcə öz adı üçün oynamır. Həmin komandalar ölkəmizin adını daşıyır. Belə şübhəli oyunlarla bağlı bizə ölkə xaricindən məktublar gəlir. Belə olmaz… Əgər bilsək ki, hər hansı bir komanda oyun alğı-satqısına gedib, ciddi tədbirlər görəcəyik".