Şamaxı-Göylər-Padar Çöl avtomobil yolunda tikinti-təmir işləri aparılır.

Azəryolservis ASC-dən Axar.az-a verilən məlumata görə, Şamaxı-Göylər-Padar Çöl avtomobil yolunun uzunluğu 54 kilometrdir. Hazırda yolun III texniki dərəcəyə uyğun yenidənqurulması işləri davam etdirilir. Layihə üzrə yolun hərəkət zolaqlarının sayı 2 olmaqla ümumi eni 12 metrdir. Bura 8 metr yolun hərəkət hissəsi, hər tərəfdə 2 metr olmaqla çiyinlər daxildir. Asfalt-beton örtüyünün qalınlığı 25 santimetrdir.

Hazırda layihə üzrə sözügedən yolda bir-neçə istiqamətdə işlər aparılır. Padardan Şamaxı istiqamətinə 0-10-cu kilometrliyində işlər tam olaraq yekunlaşdırılıb. 10-27-ci kilometrlik hissəsində 3 qat asfalt-beton örtük döşənərək, çiyinlər bərkidilib. Yolun 27-37-ci kilometrlik hissəsində mövcud yol yatağı 2,5-3,5 metr qazılır, sağlamlaşdırma işləri gedir. Yararsız torpaq çıxarılaraq yerinə karbonat material doldurulur və üzərinə qırmadaş qarışığı ilə əsas tikilir.

Şamaxı-Göylər-Padar Çöl avtomobil yolunun 39-cu kilometrliyindən Şamaxıya doğru 6 kilometrlik hissədə artıq 3 qat asfalt-beton örtük döşənib və bu istiqamətdə işlər davam etdirilir. Yolun 54-cü kilometrlik hissəsində sel daşqınlarının qarşısını almaq üçün kiçik su ötürücüləri tikilir. Yolda ümumilikdə 45 su ötürücüsü və 2 alt keçidin inşası aparılır.