Tərtərdə toy çadırının atəşə tutulması nəticəsində yaralanan qadının vəziyyəti əməliyyatdan sonra normaldır.

Axar.az xəbər verir ki, "BBC Azərbaycanca"nın rayonun Qapanlı kəndindən hazırladığı reportajda belə deyilir. Kənd sakini Nofəl Əliyev danışıb ki, sentyabrın 1-də həyat yoldaşı Müşkinaz Tanrıverdiyeva ilə birgə qohumlarının toyuna gəliblər.

"Sünnət toyuna dəvətli idik, yoldaşım bacısıyla çörək yediyi zaman düz yaxınlıqdakı ağaca vurdular, güllə istiqamətini dəyişib yoldaşımı yaraladı, güllə mədəsini, dalaq və diafraqmasını, döş qəfəsini deşib içəri keçib", - N.Əliyev deyib.

Onun sözlərinə görə, güllələrdən qırılan ağac mağarın üzərinə düşüb, nəticədə Əliyevin baldızı və nəvəsi xəsarət alıb.

63 yaşlı Müşkinaz Tanrıverdiyeva gecə saat 1-də Bərdə Mərkəzi Rayon Xəstəxanasında əməliyyat edilib. Bacısı Mədinə Əhmədova isə Tərtər Mərkəzi Rayon Xəstəxanasına çatdırılıb. N.Əliyevin 3 yaşlı nəvəsi də yüngül zədə aldığından, tibbi müayinədən sonra evə buraxılıb.

Zərərçəkmişin dediyinə görə, hadisə təsadüfi olmayıb: "Toyun səsləri onlarda eşidilir, ona görə də düz mağarı hədəf alıblar".

Qeyd edək ki, Ermənistan Silahlı Qüvvələri sentyabrın 1-də Tərtərin Qapanlı kəndini atəşə tutub və 3 nəfər yaralanıb. Hadisəni hərbi cinayət kimi qiymətləndirən Azərbaycanın Xarici İşlər Nazirliyi bildirib ki, diplomatik nümayəndəliklər hadisəni beynəlxalq təşkilatlar qarşısında qaldıracaq.