Ana səhifə İdman |
Rəqiblərimizdən ikisi "böyük beşlik"də olan ölkələrin klublarıdır. Belə klublara qarşı oynamaq nə qədər çətin olsa da, bir o qədər xoş olacaq.
Axar.az xəbər verir ki, bunu "Qarabağ"ın baş məşqçisi Qurban Qurbanov deyib.
Ağdam klubunun çalışdırıcısı "Qol.az"a geniş müsahibəsində qeyd edib ki, hər bir matça var gücümüzlə hazırlaşıb, yaxşı nəticə qazanmağa çalışacaqlar.
Onun sözlərinə görə, yeni transferləri canlı görməyib: "Düşünürəm ki, komandamıza faydalı olacaqlar. Gəlsinlər, yaxından tanıyandan sonra daha ətraflı fikir bildirərəm.
Ümumiyyətlə, yeni transferlər bəzən uğurlu olur, bəzən də uğursuz. "Qarabağ" klub olaraq hələ tam böyüməyib.
Addım-addım irəli getməyə çalışırıq. Böyük klublar istədiyi futbolçunu almaq imkanına sahibdir. Biz isə hər zaman axtarışda oluruq".
Qurbanov Reynaldo ilə bağlı təkliflər olduğunu təsdiqləyib: "Biz də bu təklifləri dəyərləndirməyə çalışırıq. Amma o, hələ bizə lazımdır. Çünki Avropa Liqasının qrupunda vacib oyunlarımız var.
O, bu oyunlarda özünü yaxşı tərəfdən göstərsə, daha səviyyəli klublara transfer oluna bilər.
Mümkündür ki, elə bir təklif olsun, hansısa klubla danışığa gedək. Reynaldo deyil, başqa futbolçulara da yaxşı təkliflər olsa, danışığa getməyə hazırıq. Biz artıq təkcə futbolçu almağa deyil, satmağa da alışmalıyıq".
Tarix
2015.09.03 / 22:21
|
Müəllif
Emil Salamoğlu
|