Əgər Rusiya Dağlıq Qarabağa öz sülhməramlılarını yeritsə, o zaman Azərbaycanla birgə proyektlərin icrasını tamamilə unutmalıdır.

Axar.az xəbər verir ki, bunu rus politoloq Vadim Dubnov söyləyib.

O, Ermənistan mətbuatına müsahibəsində deyib ki, Kreml heç vaxt Azərbaycandan əl çəkməz: "Mən inanmıram ki, Moskva öz qoşunlarını Qarabağa yeritmək qarşılığında Azərbaycana Qarabağın qaytarılmasına söz verib. Rusiya, ümumiyyətlə, Azərbaycana heç bir söz verə bilməz. Ona görə ki, Moskva müharibədə əsas monopolist deyil".

Ekspertin sözlərinə görə, Ermənistan Dağlıq Qarabağın müstəqilliyini tanıya bilməz: "Əgər Ermənistan Dağlıq Qarabağı tanısa, bu, danışıqlar prosesinin sonu deməkdir. İndiki halda bu nə Moskvanı, nə də Vaşinqtonu qane edir. Ona görə də İrəvan Qarabağı tanımayacaq. Üstəlik, Ermənistanın bütün addımları Moskva ilə razılaşdırılmadan atılmır".