Nazir Səlim Müslümov İsrailin ölkəmizdəki səfiri ilə görüşüb.

Əmək və Əhalinin Sosial müdafiəsi Nazirliyindən Axar.az-a verilən məlumata görə, İsrail Dövlətinin ölkəmizdəki fövqəladə və səlahiyyətli səfiri Dan Stavla tanışlıq görüşü nazirlikdə baş tutub.

Görüşdə nazir dünyada yaşanan siyasi-iqtisadi böhran proseslərinə baxmayaraq, ölkəmizdə dinamik iqtisadi inkişafın davam etdiyini vurğulayıb. Nazir son 12 ildə milli iqtisadiyyatda 3,4 dəfə, o cümlədən qeyri-neft sektorunda 2,6 dəfə artımın əldə edildiyini bildirib. Nazir bildirib ki, ölkə iqtidarının social yönlü siyasəti qeyd olunan dövrdə əhalinin gəlirlərinin inflyasiyanı üç dəfədən çox üstələyərək 6,5 dəfə, orta aylıq əmək haqqının 5,6 dəfə artmasına səbəb olub və 1,400 mindən çox yeni iş yerinin açılmasına imkan verib.

S.Müslümov qeyd edib ki, imtiyazlı təbəqələrdən olan 5550 nəfərə yaxın şəxs dövlət büdcəsi hesabına minik avtomobili ilə təmin olunub.

Nazir bildirib ki, İsraillə ölkəmiz arasında güclənən əlaqələr iki ölkə arasında əmək və sosial müdafiə sahəsində əməkdaşlıq üçün şərait yaradır.

D.Stav ölkəsinin sabitlik və tolerantlıq məkanı olan Azərbaycanla əməkdaşlığının daim inkişaf etməsindən məmunluğunu ifadə edib. O, ölkəmizdə bütün sahələrdə olduğu kimi, əmək və sosial təminat sistemində aparılan uğurlu işlərin də onda böyük maraq doğurduğunu bildirib. D.Stav Azərbaycanda fəaliyyəti dövründə iki ölkə arasında bu sahədə də əməkdaşlıq üçün səylər göstərəcəyini vurğulayıb. Görüşdə Azərbaycan və İsrail arasında əmək və sosial müdafiə sahəsində əməkdaşlıq imkanları ilə bağlı fikir mübadiləsi aparılıb.