Qış mövsümü ilə əlaqədar Azərbaycan Dəmir Yolları kadrlarla xüsusi dərslər keçirir. QSC qışa hazırdır.

Axar.az-a Azərbaycan Dəmir Yolları QSC-dən verilən məlumata görə, "Təsərrüfatların qış mövsümünə hazırlığı barədə texniki tədbirlər" planı təsdiq edilib.

Tədbirlər planına əsasən, yük daşımaları, infrastruktur, sərnişin daşımaları, dəmir yollarının və texniki qurğularının təmir-tikinti departamentləri, elektrik təchizatı, işarəvermə və rabitə təsərrüfatları üzrə görüləcək işlər müəyyən edilib. Departamentlərin bütün təsərrüfatları üzrə baxışlar, hərəkətin təhlükəsizliyi ilə bağlı kadrlara xüsusi dərslər keçirilir.

Qış mövsümündə işçilər fərdi mühafizə vasitələri, qış geyimləri və lazımi alət və ləvazimatlarla təmin edilir, istehsalat və inzibati binaların dam örtükləri, qapı və pəncərələri təmir edilir.

Stansiyalarda qarla operativ mübarizə planının hazırlanması üçün üçnövbəli briqadaların yaradılması işlər aparılır.

Həmçinin, lokomotivlərin qum vermə sisteminin qaydaya salınması və yol təsərrüfatında qartəmizləyən texnikanın təmiri prosesi aparılır.