Azərişıq ASC Şimal-Qərb regionunda elektrik enerjisi təminatını yüksəldir.

ASC-dən Axar.az-a verilən məlumata görə, Şimal-Qərb RETSİ-nin struktur tərkibinə daxil olan Elektrik Şəbəkələrində istehlakçıların dayanıqlı və keyfiyyətli elektrik enerjisi ilə təchizatı üçün xeyli işlər görülüb. Qış aylarında elektrik təchizatında problemlərin yaranmaması üçün xüsusi proqram hazırlanıb. Regionun sərt qış havasını nəzərə alaraq hazırlıq işlərinin başa çatdırılması üçün ən vacib məntəqələrdə ikinövbəli iş rejimi tətbiq olunub.

Qış fəslinin xüsusilə daha sərt keçdiyi bölgələrdə hava xətlərinin böyük hissəsi yenidən qurulub. Bu məqsədlə 17 ədəd 110, 79 ədəd 35 kV-lıq fiziki köhnəlmiş dayaqlar yeni dayaqlarla və naqillər 10960 metr məsafədə AS-50, 2900 metr məsafədə AS-95 markalı naqillə əvəz edilib.

Regionların hər bir şəhəri, qəsəbəsi və kəndinin dayanıqlı və keyfiyyətli elektrik enerjisi ilə təchiz olunmasını və sərf olunmuş enerjinin dəyərinin ödənilməsi məqsədi ilə izahlı və praktiki işlər aparılır.