İngiltərənin nüfuzlu "Tayms" qəzeti Rusiya Prezidenti Vladimir Putini tənqid edib.

Axar.az xəbər verir ki, qəzet S-400 hava hücumundan müdafiə sistemlərini Suriyaya göndərməklə Rusiyanın təhlükəsiz bölgənin yaradılmasına mane olmağa çalışdığını iddia edib.

Bundan başqa, qəzet müdafiə sistemləri vasitəsilə Qərb koalisiyası və Türkiyənin bölgədə keçirdiyi əməliyyatların zəifləyəcəyini də istisna etməyib:

"Rusiya S-400-lər vasitəsilə bütün Suriya səmasına nəzarət edəcək. Hava sahəsində nəzarəti əlində saxlayan Moskva başqa ölkələrin terrorçulara qarşı əməliyyat keçirməsinə də mane olacaq. Bu, Türkiyə, NATO və digər ölkələrin Suriya səmasında terrorçuları məhv etmək və digər əməliyyatlar həyata keçirmək üçün Rusiyadan icazə alacağı anlamına gəlir".

Qeyd edək ki, S-400 sistemi 480 kilometrdən hədəfi təyinetmə, 400 kilometrdən isə hədəfi məhvetmə qabiliyyətinə malikdir. Yüksəklikdə isə 56 kilometr hündürlükdə ballistik raketlərə qarşı da istifadə edilə bilər.