Lavrovun təkliflərindən Azərbaycan üçün yaxşı heç nə gözləmirəm.

Axar.az xəbər verir ki, bu sözləri politoloq Elxan Şahinoğlu bildirib.

Onun sözlərinə görə, Kreml Dağlıq Qarabağ ətrafındakı rayonların azad olunmasında israr etməyəcək.

Xarici İşlər naziri Elmar Məmmədyarovun Azərbaycan və Ermənistan prezidentlərinin dekabrda görüşəcəyi ilə bağlı məlumatına diqqət çəkən politoloq qeyd edib ki, Lavrovun təklifləri həmsədr ölkələrin adından verilib.

"Bir çox beynəlxalq məsələdə (Suriya, Ukrayna) Rusiya ilə ABŞ arasında ciddi fikir ayrılığı var. Necə oldu ki, Dağlıq Qarabağ münaqişəsinin həllinin detalları məsələsində Vaşinqtonla Moskva razılığa gəldilər? Bütün hallarda Lavrovun təkliflərindən Azərbaycan üçün yaxşı heç nə gözləmirəm. Rusiya-Türkiyə münasibətlərinin gərginləşməsi fonunda Kreml Dağlıq Qarabağ ətrafındakı rayonların azad olunmasında israr etməz, israr etsə də, əvəzində sazişdə referendum tarixinin keçiriləcəyi günü göstərməyə çalışacaq ki, bu da Azərbaycanın maraqlarına uyğun deyil".