Yaxın Şərqdəki dövlətlərin sərhədləri de-fakto dəyişəcək.

Axar.az xəbər verir ki, bunu Rusiya mətbuatına açıqlamasında politoloq Aleksey Malaşenko söyləyib. Onun sözlərinə görə, bundan sonra əsas məsələ bu dəyişikliklərin hansının beynəlxalq ictimaiyyət tərəfindən de-yure tanınması olacaq:

"Məsələn, Bəşər Əsəd "kiçik Suriya"nın prezidenti kimi qalacaq. Lakin Rusiya hakimiyyəti yəqin ki, onu əvvəlki Suriyanın sərhədləri çərçivəsində olan dövlətin lideri kimi tanıyacaq. ABŞ-ın Əfqanıstan təcrübəsi göstərir ki, vətəndaş müharibəsi olan müsəlman ölkələrinə girmək asan, amma oradan çıxmaq çox çətindir. Moskva Əsədi yenidən prezident seçkisində qalib etməyi bacaracaq, lakin onun nəticələrini çoxları tanımayacaq. Digər varianta gəlincə isə Əsəd yaranmış koalisiya hökuməti vasitəsilə tədricən yoxa çıxacaq. Koalisiya hökumətinin edəcəyi ilk iş isə Rusiyanın Suriyadakı, o cümlədən Tartusdakı mövcudluğundan canını qurtarmaq olacaq. Tartusu əlində saxlamaq üçün Rusiya burada ikinci Sevastopol düzəltməlidir".