3-cü Regional İnternet İdarəçilik Forumu dekabrın 4-də "Bakutel 2015" Sərgi-Konfransı çərçivəsində Azərbaycan Rabitə və Yüksək Texnologiyalar Nazirliyi və BMT İnkişaf Proqramının Bakı Ofisi təşkilatçılığı ilə keçiriləcək.

Rabitə və Yüksək Texnologiyalar Nazirliyindən Axar.az-a verilən məlumata görə, "RİFAZ 2015"- 3-cü "Regional İnternet İdarəçilik Forumu Azərbaycan" adlı tədbir "İKT İnnovasiyalarının Regional İnkişaf Mühitinin Yaradılması" devizi altında ADA Universitetində keçiriləcək.

Forumun əsas məqsədi, İKT-nin regional inkişaf mərkəzi olan Azərbaycanda, yerli və beynəlxalq İKT mütəxəssislərini bir araya gətirmək və əməkdaşlıq əlaqələrini dərinləşdirmək imkanı təqdim etməkdir.

Tədbirdə Azərbaycanla yanaşı, bir sıra xarici ölkələrdən olan hökumət strukturlarının, biznes, elm sahələrinin və vətəndaş cəmiyyətinin nümayəndələri İnternet şəbəkəsinin aktual problemlərini müzakirə edəcəklər.

Xatırladaq ki, bu tədbirə qədər ölkəmiz müxtəlif illərdə və ölkələrdə təşkil edilmiş forumlarda yaxından iştirak edərək təcrübə mübadiləsi aparıb və nailiyyətlərimiz nümayiş etdirilib.