Ana səhifə Sağlıq |
Dünya Səhiyyə Təşkilatı (WHO/DST) zika virusuna görə qlobal fövqəladə vəziyyət elan edib.
Axar.az xəbər verir ki, bu virus hamilə qadınlara yoluxanda beyni inkişafdan qalmış və başları normadan balaca uşağın doğulmasına səbəb olur.
DST zika virusunun minlərlə insanın ölümünə səbəb olan Ebola epidemiyası ilə eyni səviyyədə təhlükəli olduğunu qeyd edib. Fövqəladə vəziyyət elanı tibbi yardım və peyvənd araşdırmalarının sürətləndirilməsini təmin edəcək.
DST rəhbəri Marqaret Çan xüsusilə Amerika qitəsində yayılan zika virusu haqda bunları deyib: "Latın Amerikasında müşahidə olunan virus beynəlxalq problem yarada biləcək səviyyədə təhlükəlidir. İlk növbədə hamilə qadınlarla uşaqları qorumağa çalışacağıq. Virusu yayan ağcaqanadlara qarşı da mübarizə tədbirləri görülür".
Xatırladaq ki, keçən həftə də konfrans keçirilərək zika virusunun həddindən artıq sürətlə yayıldığı, 2016-cı ildə 3-4 milyon nəfərə yoluxacağı bildirilib.
İndiyə qədər 20 ölkədə zika virusuna yoluxanlar müəyyən edilib. Oktyabrdan bu yana təkcə Braziliyada 4 minə yaxın uşaq inkişafdan qalmış beyinlə və normadan balaca başla (mikrosefaliya) doğulub.
Tarix
2016.02.02 / 17:54
|
Müəllif
Nilufər Muğantürk
|