Ana səhifə Toplum |
Bakıda rəfiqəsini öldürən qız hökmdən apelyasiya şikayəti verib.
Axar.az xəbər verir ki, 9 il 6 ay müddətinə azadlıqdan məhrum edilən 1998-ci il təvəllüdlü Aydan Xalitova cəzasının yüngülləşdirilməsini istəyib.
Bakı Apelyasiya Məhkəməsi birinci instansiya məhkəməsinin hökmünü qüvvədə saxlayıb. APA-nın xəbərinə görə, A.Xalitovanın kassasiya şikayətinə Ali Məhkəmədə fevralın 10-da baxılacaq.
Hadisə 2014-cü il, noyabrın 27-də Buzovna qəsəbəsində baş verib. Aydan Xalitova tanışı Şəms Abdullayevaya bıçaqla xəsarət yetirərək, onu ağır yaralayıb. Həkimlərin müdaxiləsinə baxmayaraq, Şəms dünyasını dəyişib.
İstintaqla müəyyən edilib ki, yetkinlik yaşına çatmayan A.Xalitova anasının himayəsində olarkən yüngül həyat tərzi keçirdiyi üçün anası ondan imtina edib.
O, Buzovnada rəfiqəsi Şəmslə kirayədə qalıb, birlikdə kafedə ofisiant işləyiblər. Sonra tez-tez mübahisələr yaranıb, Aydan rəfiqəsinə xəbərdarlıq edib ki, tanış olduğu insanları evə gətirməsin.
Noyabrın 27-də Aydan Şəmsin Musa Sultanov adlı tanışının VAZ markalı maşınına mindiyini görüb. Ona yaxınlaşaraq kirayədə qaldıqları mənzilin açarını istəyib.
Şəms açarı verməkdən imtina edib və mübahisə düşüb. Bu zaman Aydan üzərində olan açılıb-qatlanan bıçaqla sinəsinə zərbə endirməklə onu qətlə yetirib.
Tarix
2016.02.08 / 18:49
|
Müəllif
Emil Salamoğlu
|