Ermənilərin Suriyada İŞİD-ə qarşı döyüşməsi xəbəri təsdiqini tapıb.

Axar.az xəbər verir ki, erməni sosial şəbəkələrində erməni yaraqlılarının Suriya əsgərləri ilə fotoları yayılıb.

Ermənistan ictimaiyyətini təşvişə salan bu xəbər müxalifətin də narahatlığına səbəb olub.

Belə ki, hazırda ölkənin kütləvi informasiya vasitələrində və sosial şəbəkələrdə yayılan xəbərlərdə bir qism gəncləri Suriyadakı Kəssab ermənilərini müdafiə etməyə, digər bir qism İŞİD-ə qarşı birgə döyüşməyə, bəziləri isə İŞİD-i Ermənistana bəla etməməyə çağırıb.

Məlumatlarda Zabel Qevorqi Torosyan, Ohanesi Kalbank Xetimyan, Qaraqin Bogaryan, Salim Sarqi Andraniki, Maniel Hovhanesi Keşişyan, Levon Avetis Ketencyan, Harutyun Krikuri Kicaryan adlı şəxslərin tez-tez Suriyadan Ermənistana səfər edərək imkansız gəncləri İŞİD-ə qarşı döyüşməyə apardığı da qeyd edilib.

Lragir.am internet nəşrinin siyasi icmalçısı Hakob Badalyan rəsmi İrəvanı Ermənistanı İŞİD-in hədəfinə çevrilməsinin qarşısını almağa çağırıb.

Qeyd edək ki, Suriyada hökumət qüvvələrinin nəzarətində olan ərazilərdə hazırda 5 minə qədər erməni ailəsi yaşamaqda davam edir. İŞİD təhlükəsindən qaçıb Ermənistana sığınmaq istəyən Suriya erməniləri Dağlıq Qarabağda məskunlaşmaqdan narazıdırlar. Belə ki, onlar yenidən döyüş ərazisində yaşamaqdansa, Suriyada öz torpaqlarında yaşamağı üstün tuturlar.