Mənim Nyu Hempşirdəki seçkilərdə qazandığım qələbə Vol Strit və Vaşinqtona mesajdır.

Axar.az xəbər verir ki, bunu jurnalistlərə açıqlamasında Demokratlar Partiyasından ABŞ prezidentliyinə namizəd olan Berni Sanders söyləyib. Onun sözlərinə görə, ABŞ hakimiyyəti varlılara yox, xalqa məxsusdur.

Qeyd edək ki, Nyu Hempşirdə baş tutan seçkilərdə hələlik bülletenlərin 68%-i sayılıb. Sayılan bülletenlərə əsasən, Sanders ümumi seçicilərin 60%, Klinton isə 39%-nin səsini toplayıb.

Sanders ABŞ-da özünün demokrat sosialist adlandıran yeganə senatordur. Sol baxışları ilə seçilən senator həm də idarəetmədə Skandinaviya sosial-demokrat modelinin tərəfdarıdır. Sanders həmçinin ABŞ Konqresində uzun müddət yer alan senatorlar içərisində rekordsmen hesab edilir. Siyasətçinin məhz sola meyllənməsi və ölkədə islahatlarla bağlı sərt çıxışları Sandersin ABŞ cəmiyyətində tərəfdarlarının sayını artırıb. Bəzi ekspertlər isə məhz bu seçkilərdə ABŞ prezidentliyi uğrunda əsas mübarizənin bir-birinə tam əks mövqedə dayanan Berni Sanders və Donald Tramp (Respublikaçılar Partiyası – red.) arasında olacağını iddia edirlər. Belə ki, Ayova ştatında Ted Kruza məğlub olan radikal siyasətçi Tramp Nyu Hempşirdə liderliyi yenidən əlinə keçirib.

Vol Strit Nyu York şəhərində yerləşir. Məhz bu ərazi dünyanın aparıcı maliyyə nəhənglərinin baş qərargahı hesab edilir. Bəzi ekspertlər burada yerləşən qurumların dünya iqtisadiyyatına birbaşa təsir edərək, onu yönləndirdiklərini iddia edirlər.