YUKOS şirkətinin keçmiş rəhbəri Mixail Xodorkovskiyə qarşı İnterpol xətti ilə beynəlxalq axtarış elan edilib.

Axar.az xəbər verir ki, bu barədə informasiyanı "İnterfaks" agentliyi yayıb.

Agentlik artıq Rusiya İstintaq Komitəsinin bununla bağlı sənədləri İnterpolun Liondakı mərkəzi ofisinə verdiyini bildirib. Xodorkovski Nefteyuqansk meri Valeri Petuxovun ölümündə günahlandırıldığı üçün axtarışa verilib.

Qeyd edək ki, 2014-cü ildə YUKOS şirkəti Rusiyanı Beynəlxalq Arbitraj Məhkəməsinə şikayət edib. Şirkət Rusiyadan 50 milyard dollar təzminat istəyib.

Xodorkovski 2003-cü ildə ölkədəki korrupsiya hallarını kəskin tənqid etdiyinə görə Rusiya rəhbərliyinin qəzəbinə səbəb olub. Bundan bir müddət sonra o, həbs edilib. 2013-cü ildə azadlığa çıxan biznesmen İsveçrəyə köçüb. 2014-cü ildə mətbuata açıqlama verən Xodorkovski Rusiyanın növbəti prezidenti olmaq istədiyini bəyan edib.