Kollektiv Təhlükəsizlik Müqaviləsi Təşkilatının Baş katibi Nikolay Bordyuja öz postunu 2017-ci ildə tərk edəcək.

Axar.az xəbər verir ki, bu barədə informasiyanı Rusiya mətbuatı yayıb. Mətbuat Bordyujanı bu postda təşkilatın digər üzv ölkələrindən birinin nümayəndəsinin əvəz edəcəyini bildirib.

Qeyd edək ki, KTMT mayın 15-i 1992-ci ildə Daşkənd paktının imzalanmasından sonra fəaliyyətə başlayıb. Müqavilə Ermənistan, Qazaxıstan, Rusiya, Qırğızıstan, Tacikistan, Özbəkistan arasında imzalanıb. 1993-cü ildə təşkilata Azərbaycan, Belarus və Gürcüstan da üzv olublar. Daşkənd müqaviləsi 1994-cü il aprelin 20-də qüvvəyə minib. Həmin dövrdə müqavilə 5 il üçün nəzərdə tutulmuşdu. 1999-cu ildə Ermənistan, Qazaxıstan, Rusiya, Qırğızıstan, Tacikistan, Belarus bu müqaviləyə yenidən imza atdılar. Azərbaycan, Gürcüstan və Özbəkistan isə təşkilatda üzvlükdən imtina etdilər. Bundan sonra elə həmin il Özbəkistan Gürcüstan, Azərbaycan, Ukrayna və Moldovanın yaratdığı GUAM təşkilatına üzv oldu.