Bu gün Bakının bəzi küçələrində nəqliyyatın hərəkəti məhdudlaşdırılıb.

Bakı Şəhər Dövlət Yol Polisi İdarəsinin bölmə rəisi Vaqif Əsədov ANS-ə açıqlamasında bildirdi ki, İstiqlaliyyət küçəsində asfalt örtüyünün yenilənməsi işlərinə start verilib.

"Bu səbəbdən Niyazi küçəsindən İstiqlaliyyət küçəsinə hərəkət qismən məhdudlaşdırılıb. Amma Şeyx Şamil küçəsindən İstiqlaliyyət küçəsi istiqamətində hərəkət edən sürücülər üçün məhdudiyyət qoyulmayıb", - deyə Vaqif Əsədov bildirdi.

Vaqif Əsədov qeyd etdi ki, sürücülər alternativ yol kimi Rəşid Behbudov küçəsi ilə Füzuli küçəsindən keçməklə həmin istiqamətlərlə hərəkət edə bilərlər.

"Bu alternativ yollar vasitəsi ilə İstiqlaliyyət küçəsi, 5 mərtəbə və həmin ərazilərə yaxın küçə və prospektlərə maneəsiz hərəkət etmək olar", - deyə bölmə rəisi qeyd etdi.

Həmçinin Bakının Niyazi küçəsi ilə Neftçilər prospektinin kəsişməsində nəqliyyatın hərəkəti tamamilə məhdudlaşdırılıb.

İş icraçılarının verdiyi məlumata görə, təmir işləri sabah axşama qədər yekunlaşdırılacaq.

Təmir işləri iyun ayında keçiriləcək "Formula-1" yarışı ilə bağlı aparılır. İşlər paytaxtın əsasən yarış trekinin üzərinə düşən mərkəzi küçələrində həyata keçirilir.