Biz Səudiyyə Ərəbistanı ilə Rusiya arasında hasilatın dondurulması barədə imzalanmış sazişi dəstəkləyirik.

Axar.az xəbər verir ki, bunu Tehranda İraq, Qətər və Venesueladan olan həmkarları ilə görüşdən sonra İranın Neft naziri Bicən Zəngənə deyib.

Nazir Tehranın neft bazarında vəziyyəti sabitləşdirməyə yönələn səyləri dəstəklədiklərini bildirib:

"Ümid edirəm ki, bu cəhdlər nəticəsində gələcəkdə bazarda vəziyyətin yaxşılaşmasının şahidi olacağıq".

Nazir İranın hasilatı dondurub-dondurmayacağı barədə isə heç nə deməyib.

İranın bu açıqlamasından sonra birjalarda neftin qiyməti 32 dollardan 35 dollara qədər yüksəlib.

Qeyd edək ki, fevralın 16-da Səudiyyə Ərəbistanı və Rusiya neft hasilatını 11 yanvar 2016-cı il səviyyəsində saxlamaq barədə razılaşıb.

Birjalarda neftin qiyməti 2014-cü ilin iyulundan ucuzlaşmağa başlayıb. Ucuzlaşmanın başlıca səbəbi kimi isə hasilatın çoxluğu göstərilir.