Millət vəkili Qənirə Paşayevanın Əskişəhərdə Qarabağ parkı təklifi bələdiyyə başqanı tərəfindən dəstəklənib.

Axar.az xəbər verir ki, Türkiyənin Əskişəhər bölgəsində Xocalı soyqırımı ilə bağlı konfrans keçirən Qənirə Paşayeva Təpəbaşı bələdiyyə başqanı Əhməd Atacla görüşüb.

Görüş zamanı qədim Təpəbaşını da Azərbaycan bölgələrindən biri ilə qardaş olaraq görmək istədiyini bildirən millət vəkili bələdiyyə başqanı ilə Dağlıq Qarabağ problemi, Xocalı soyqırımı, qondarma erməni soyqırımı iddiaları ilə bağlı fikir mübadiləsi aparıb.

Əhməd Atac Təpəbaşı bələdiyyəsinə rəhbərliyi dövründə Azərbaycanla bütün istiqamətlərdə əməkdaşlığın inkişafına xüsusi önəm və diqqət edəcəyini deyərək, qardaş bələdiyyələr məsələsi ilə də bağlı addımlar atılacağını deyib.

Bələdiyyə başqanı Qənirə Paşayevanın Təpəbaşında Qarabağ parkı təklifinə mütləq baxılacağını deyib.

Sonda "Qənirə Paşayeva ilə addım-addım Türk dünyası" kitabı barədə danışan deputat kitabın növbəti hissələrində qədim Təpəbaşının da yer alacağını bildirib.