Avropa Birliyi (AB) Komissiyasının Miqrasiya, Daxili İşlər və Vətəndaşlıq üzrə Komissarı Dmitris Avramopulos 10 gündən sonra Şengen zonasının çökə biləcəyini açıqlayıb.

Axar.az xəbər verir ki, Belçikanın paytaxtı Brüsseldə jurnalistlərin suallarını cavablandıran AB rəsmisi Türkiyədən Avropaya keçən miqrantların sayını azaltmaq üçün 10 gün vaxt qaldığını deyib:

"AB-nin Türkiyə ilə martın 7-də keçiriləcək xüsusi zirvəsinə qədər miqrantların sayını azaltmaq lazımdır. Böhran qapıya dirənib. Önümüzdəki 10 gün ərzində konkret və dəqiq nəticələr əldə etməsək, Şengen zonası çökəcək. Təktərəfli, ikitərəfli və ya üçlü addımlarla yola davam edə bilmərik. Bunların ilk mənfi təsirlərini onsuz da görürük".

Xatırladaq ki, Avropa Şurasının sədri Donald Tusk yanvarın 19-da Şengen zonasının qorunması üçün 2 ay vaxt qaldığını açıqlamışdı.