Gürcüstan Azərbaycandan əlavə olaraq 500 milyon kubmetr qaz alacaq.

Axar.az xəbər verir ki, bu, SOCAR və Gürcüstan hökuməti arasında imzalanan memorandumda əksini tapıb. Sənədə əsasən, Gürcüstana ötürülən sosial qazın qiyməti aşağı salınacaq. Bu, əhaliyə məzənnə dəyişikliyindən çəkdiyi zərərin bir qismini kompensasiya etməyə imkan verəcək. SOCAR həmçinin benzindoldurma məntəqələri üçün nəzərdə tutulan qazın qiymətini də 35-40 dollara qədər ucuzlaşdıracaq.

Qeyd edək ki, bu gün SOCAR və Gürcüstan hökuməti arasında Azərbaycandan nəql olunan qazın həcminin artırılmasına dair memorandum imzalanıb. Sənədi SOCAR prezidenti Rövnəq Abdullayev və Gürcüstanın Energetika naziri Kaxa Kaladze imzalayıblar.

Azərbaycan Gürcüstanın əsas qaz təchizatçısıdır. Tiflis qaza olan tələbatının təxminən 90%-ni Bakıdan alır.