Paytaxtda oğurluq hadisəsi qeydə alınıb.

Daxili İşlər Nazirliyinin (DİN) mətbuat xidmətindən Axar.az-a verilən məlumata görə, Sabunçu RPİ 13-cü PB və Kəpəz RPİ əməkdaşlarının həyata keçirdikləri əməliyyat-axtarış tədbirləri nəticəsində martın 1-də "Express bank"a məxsus ödəmə terminalından 12801 manat oğurlamış Gəncə şəhər sakini Mobil Ağayev tutulub.

Faktla bağlı araşdırma aparılır.

***

Digər oğurluq faktının üstü isə Xırdalanda açılıb.

Abşeron RPİ əməkdaşlarının həyata keçirdikləri əməliyyat-axtarış tədbirləri nəticəsində martın 1-də və 2-də Xırdalan şəhərində yerləşən 2 saylı orta məktəbdən 2500 manat və mobil telefon, 1 saylı orta məktəbdən 580 manat, Masazır qəsəbəsində yerləşən 1 saylı orta məktəbdən kompüter, qəsəbədə yerləşən Laçın rayonunun Çıraqlı kənd orta məktəbdəki seyfdən 700 manat və 2 saylı orta məktəbin inzibati binasından 2 ədəd kompüter oğurlamış Masazır qəsəbə sakinləri Mülkədar Rəhimov, Əkbər Kərimov və Namiq Həsənli tutulublar.

***

Gəncədə mağazadan oğurluq edən Azər Zeynalov yaxalanıb.

Kəpəz RPİ əməkdaşlarının araşdırması nəticəsində məlum olub ki, əvvəllər məhkum olunmuş Azər Zeynalov martın 2-də həmyerlisi Ərşad Zərgərova məxsus mağazadan 300 manat, spirtli içki və tütün məmulatı oğurlayaraq oranı yandırmağa cəhd göstərib.

***

Digər cinayət isə Lənkəranda qeydə alınıb.

Lənkəran ŞRPŞ əməkdaşlarının həyata keçirdikləri əməliyyat-axtarış tədbirləri nəticəsində ötən il sentyabrın 9-da şəhər sakini İlqar Hüseynovun evindən qızıl və məişət əşyaları oğurlamış həmyerliləri Elnur Zeynalov və Ruslan Əliyev tutulublar.

***

Bakı sakinlərindən 76 manat məbləğində pul oğurlayan Turac Məmmədova saxlanılıb.

Bakı Şəhər Baş Polis İdarəsinin Metropolitendə Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində martın 2-də Ülkər Tarverdiyevaya və Şəhla Əliyevaya məxsus ümumilikdə 76 manat oğurlamış Xırdalan şəhər sakini, əvvəllər məhkum olunmuş Turac Məmmədova tutulub.

Ondan 0,207 qram heroin götürülüb.