Serbiya Prezidenti Tomislav Nikoliç parlamenti buraxıb.

Axar.az xəbər verir ki, bu barədə informasiyanı Rusiya mətbuatı yayıb. Prezident aprelin 24-nə təcili parlament seçkisinin keçirilməsi ilə bağlı əmr imzalayıb.

Qeyd edək ki, dünən hökumət Nikoliçi parlamenti buraxmağa səsləyib. İstefaya göndərilən parlamentdəki 160 yerin sahibi indiki Baş nazir Aleksandr Vuçiçin Serbiya Proqressiv Partiyasıdır. 250 deputatdan ibarət olan yeni parlamentdə millət vəkili kreslolarının çoxunu da məhz bu partiya tuta bilər.

Aleksandr Vuçiç Serbiyada nisbətən qərbyönlü siyasət yürütməyə çalışan əsas siyasətçilərdəndir. Məhz Vuçiçin dövründə Serbiyada böyük antikorrupsiya əməliyyatları həyata keçirilib. Üstəlik, bu əməliyyatlar zamanı Rusiyaya yaxınlığı ilə seçilən onlarla şəxs həbs edilib. Serbiyanın bir müddət öncə NATO ilə yaxınlaşması Moskvanı əsəbiləşdirib. Məhz buna görədir ki, Rusiyanın dəstəyi ilə ölkədə müxalifətin qərbyönlü siyasətə qarşı etirazları başlayıb. Serbiya mətbuatı isə hakim partiyanın daxilində də Belqradın qərbyönlü siyasətini bəyənməyənlərin olduğunu və onların da Rusiya ilə yaxınlaşdığı bildirib.