Türkiyə Prezidenti Rəcəb Tayyib Ərdoğan aprelin 25-də Azərbaycana səfər edən zaman onu müşayiət 30-a yaxın türkiyəli jurnalistə Qarabağla bağlı təlimat verib.

Publika.az-ın əldə etdiyi məlumata görə, Prezident Rəcəb Tayyib Ərdoğan Heydər Əliyev adına Beynəlxalq Hava Limanından onun üçün nəzərdə tutulan məkana gedən zaman Türkiyədən gələn jurnalistlərlə qısa görüş keçirib.

Görüş zamanı Ərdoğan jurnalistlərə müraciət edərək deyib ki, qardaş Azərbaycan dövləti Türkiyə üçün çox əhəmiyyətlidir.

Daha sonra Ərdoğan Azərbaycanın Qarabağla bağlı haqq səsinin müdafiəsində və dünyaya çatdırılmasında türkiyəli jurnalistlərdən köməklərini əsirgəməməsini xahiş edib.

Türkiyədən gələn jurnalistlərlə söhbəti zamanı Ərdoğan deyib: "Son günlər Ermənistan Azərbaycana qarşı hərbi təxribatlara əl atır, işğalçılıq siyasəti yürüdür. Ancaq dünya mediası bunu susqunluqla qarşılayır. İstəyirəm ki, siz də Azərbaycanın haqq səsinin dünyaya çatdırılmasında yaxından iştirak edəsiniz və dəstəyinizi əsirgəməyəsiniz. Bütün işlərinizdə sizlərə uğurlar arzu edirəm".