Rusiyanın Su-27 qırıcısı ötən gün Baltik dənizindəki beynəlxalq ərazilərdə müşahidələr aparan ABŞ-a məxsus RC-135 kəşfiyyat təyyarəsinin yaxınlığından uçub.

Axar.az "Anadolu Agentliyi"nə istinadən xəbər verir ki, bu barədə Pentaqon məlumat yayıb.

Məlumatda rus qırıcısının ABŞ təyyarəsinə 7,5 metrə qədər yaxınlaşdığı bildirilib.

Pentaqon rəsmisi Laura Seal Rusiyanın son vaxtlarda bu tip əməllərini artırdığını və bundan narahat olduqlarını deyib:

"Bizim hərbi təyyarələrimiz Baltik dənizində Rusiyanın ərazisini pozmayıb və bütün əməliyyatlarımız beynəlxalq bölgədə baş tutub. Bu tip hadisələr ölkələr arasındakı gərginliyi yüksəldə bilər".

Qeyd edək ki, bir neçə həftə öncə rus bombardmançıları Baltikdəki ABŞ-ın Donald Kuk gəmisinin 9 metr yaxınlığından uçmuşdu.