ABŞ hökuməti 11 Sentyabr teraktı ilə bağlı aparılan araşdırmanı ictimaiyyətə təqdim etməməlidir.

Axar.az xəbər verir ki, bunu NBC televiziyasına müsahibəsində ABŞ Mərkəzi Kəşfiyyat İdarəsinin rəhbəri Con Brennan söyləyib. Onun sözlərinə görə, bu sənədlərdə informasiyalardan bəziləri dəqiq deyil və o, ABŞ-a ziyan vura bilər:

"Bu sənədlərdə bəzi məqamlar dəqiq deyil. Aparılan yoxlamalar zamanı bəlli olub ki, Səudiyyə Ərəbistanı Əl Qaidə terror təşkilatına heç bir maliyyə dəstəyi verməyib. Bu informasiyadan çoxları bizim əleyhimizə istifadə edə bilərlər".

Qeyd edək ki, bir müddət öncə ABŞ mətbuatı Vaşinqtonun 11 Sentyabrla əlaqədar aparılan araşdırmanı ictimaiyyətə açacağını bildirib. Bu informasiya Ər-Riyadla Vaşinqton arasında qarşıdurma yaradıb.