Səhiyyə Nazirliyinin İctimai Səhiyyə və İslahatlar Mərkəzi (İSİM) mayda Bakı şəhərinin 7 rayonunda gənclər üçün sağlamlıq forumlarının keçirilməsi planlaşdırır.

Nazirliyin mətbuat xidmətindən Axar.az-a verilən məlumat görə, gənclər üçün sağlamlıq forumları Prezident yanında QHT-lərə Dövlət Dəstəyi Şurasının dəstəyi və İSİM, Bakı şəhərinin Rayon İcra Hakimiyyətlərinin, rayon Gənclər və İdman İdarələrinin və "Gənclər üçün Təhsil Mərkəzi" İctimai Birliyinin birgə təşkilatçılığı ilə baş tutacaq.

İlk forum bu gün Bakının Nərimanov rayonunda yerləşən Bakı Modern Məktəbində başlayıb.

Tədbirdə vurğulanıb ki, dünyada hər il 6 milyonadək insan tütünün zəhərli təsiri ilə yaranan xəstəliklər nəticəsində dünyasını dəyişir. XX əsrdə tütün epidemiyası dünyada 100 milyon insanın həyatına son qoyub.

Cəmiyyətdə erkən nikah problemi və erkən nikahların tibbi aspektləri" mövzusuna da toxunulub. Belə ki, erkən yaşda analardan doğulan uşaqlar arasında ölüdoğulma və körpə ölümü göstəricilərinin 20-29 yaşda anaların dünyaya gətirdiyi uşaqlara nisbətən 50% üstünlük təşkil etdiyi qeyd olunub.